早排返睇《葉問2》，講到甄子丹大戰英國拳王，不過現實中，葉問嘅仔仔葉準就話爸爸無同過英國人決鬥。講到同外國人對決，點都要講講清末武術家霍元甲，佢曾經靠個名就已經嚇走咗兩個外國大力士。

據稱，霍元甲嘅兩次擂台經驗，都係不戰而勝。第一次發生喺1901年，有個俄國人嚟天津賣藝，佢登報紙廣告自稱係「世界第一大力士」，打遍中國無敵手，仲話中國係「病夫之國」。霍元甲睇咗廣告之後已經好㷫，聽到對方詆毀中國更加即刻跳上台，話自己就係「東亞病夫」，宜家要喺台上一決高下。而呢個「世界第一大力士」可能被霍元甲嘅氣勢同威名嚇窒，竟然打都唔打就離開咗天津，霍元甲亦都因此聲名大噪。

第二次喺係8年之後，英國大力士奧比音喺上海登廣告、設擂台，公然侮辱中國人係「東亞病夫」。霍元甲應朋友之邀去咗上海，佢同奧比音比武之前，預先登英文廣告話自己專門收拾外國大力士。霍元甲早已聲名在外，奧比音睇完報紙之後，就嚇到逃之夭夭。

至於呢兩件「事蹟」嘅真確度有幾高真係不得而知，不過可以肯定嘅係，改編自霍元甲事蹟嘅電影同電視劇都或多或少有誇張、虛構嘅成份，李連杰主演嘅電影《霍元甲》更因為多處失實，尤其係講到「霍家多人被殺而無後」，被霍元甲後人霍自正告上法庭。

原圖嚟自網絡。