孫中山一生有唔同嘅稱呼，包括佢嘅名、字、號等。除咗孫文之外，最常見同廣為人知嘅名仲有孫逸仙。唔講唔知，原來呢個名係當年孫中山受洗之後，由佢國文老師區鳳墀所改。

區鳳墀原名區逢時，係廣東南海人，早年讀過牧師何福堂所著嘅《馬太福音註釋》後深受感動，受洗成為基督徒。區鳳墀中英文都叻，教會就派佢去香港灣仔堂教書同埋傳教。呢個時候，孫中山就由檀香山回國，因為中文根底差，於是就向區鳳墀拜師，後來孫中山受洗，以「孫日新」呢個名署名。嗰名取自《大學》中〈湯之盤銘〉章「苟日新、日日新、又日新」嘅意思，區鳳墀之後再以呢個名嘅廣東諧音，改為「孫逸仙」。「孫逸仙」呢個名其後開始普及，孫中山喺西方社會嘅譯名亦都以"Sun Yat-sen"為主流。

區鳳墀除咗做孫中山老師之外，亦為革命出過唔少力，佢喺1895年就加入咗成立無耐嘅興中會，並出任會計，後來亦幫助「四大寇」之一嘅陳少白創辦《中國日報》，宣揚革命。

圖片為孫中山、區鳳墀，取自網絡。