喺民國初期，各個軍閥勢力之間嘅鬥爭不斷，人命就好似草芥咁卑微，曾任袁世凱總統府警衛軍統領嘅陸建章就係個殺人無數嘅狠角色，不過佢殺人有個特點，就係會俾對方做隻飽鬼。

陸建章係安徽蒙城縣人，畢業於北洋武備學堂，曾協助袁世凱訓練新軍，之後做過幫帶、協統、總兵等職位。民國初年，陸建章任袁世凱總統府警衛軍統領兼北京政府軍政執法處處長，捕殺過唔少革命黨人同反袁民眾，所以有「陸屠夫」、「陸屠伯」之稱。陸建章好鍾意請人食飯，然後喺送客果陣從背後開槍打死對方，據講因為咁樣，啲人將佢請客嘅帖稱為「閻王帖」。 

後嚟護國戰爭爆發之後，袁世凱被逼取消帝制，陸建章喺陝西省嘅兵權亦都被削弱。1916年，陸建章個仔喺鎮壓革命派時被陝北鎮守使陳樹藩嘅部下偷襲活捉。陸建章為咗救返個仔，被迫交出陝西省嘅話事權。走人之前，陸建章將歷年搜刮嘅幾十車財富裝箱準備偷運走，點知行到半路被就陳樹藩派人劫走晒。陳樹藩背後係當時陸軍總長段祺瑞，又得到段祺瑞幕僚徐樹錚支持，種種事件令陸建章勁嬲，開始積極反對段祺瑞同徐樹錚，並支援同段祺瑞打對台嘅代理大總統馮國璋。

陸建章咁做自然引起段祺瑞、徐樹錚不滿，決定除之而後快。1918年，徐樹錚同奉系參謀長楊宇霆宴請陸建章，話有事同佢商量。陸建章到咗之後，徐樹錚引咗佢去花園，用「陸式殺人手段」，喺背後一槍打死咗陸建章。殺人無數者終被殺，可以話係報應。

圖為陸建章和徐樹錚，原圖嚟自網絡。