之前講電影《十月圍城》提到歷史人物、革命商人李煜堂同佢個仔李自重，今次就講埋另一位主角陳少白。陳少白喺《十月圍城》個角色叫秦少白，由影帝梁家輝飾演。喺戲入面，秦少白係《中國日報》嘅社長，宣傳革命思想，並策劃咗一場保護孫中山嘅行動。

現實當中，原籍新會嘅陳少白係孫中山結拜兄弟，亦係革命嘅活躍份子。陳少白早年喺孫中山老師區鳳墀嘅介紹之下，認識到孫中山，兩個年輕人一見如故，不時聚會暢談時局革命，佢哋情同手足，之後仲結拜做埋兄弟，孫中山添。後來孫中山組織興中會反清，陳少白亦一力追隨，唔單止肩負起革命宣傳嘅重任，仲成為孫中山早期親密嘅戰友。

喺1899年，陳少白喺香港中環士丹利街創辦《中國日報》，鼓吹革命，1900年嘅惠州起義亦就係喺呢度策劃，之後起義失敗，《中國日報》會址亦成為收留革命份子嘅地方。隨住辛亥革命推翻滿清，陳少白認為自己已經實現「推翻滿清、恢復中華」嘅理想，就逐漸淡出政治舞台，喺1922年陳炯明叛變之後，陳少白就返到家鄉辦學、起路，做實事，實踐孫中山「實業救國」、「鄉村自治」思想。

原圖嚟自網絡。