有人話香港因為有國學大師饒宗頤先不至於變成文化沙漠，自從饒老舊年過咗身，香港又「打回原形」。但饒宗頤自己唔係咁睇，佢生前講過：「是香港造就了我。很多人覺得香港是沙漠，香港根本不是沙漠，視乎自己的努力，沙漠也可變成綠洲。」

同已故國學大師季羨林並稱「南饒北季」嘅饒宗頤，生於廣東省潮安縣，父親饒鍔係潮州著名學者，亦都係錢莊老闆，屋企擁有粵東地區最大嘅書樓——「天嘯樓」。饒宗頤細細個就埋首書堆，研讀古籍，雖然未接受過學校系統式嘅教育，但爸爸為佢聘請多位名師指導，為饒宗頤日後嘅成就打下基礎。饒鍔去世之後，18歲嘅饒宗頤繼承父親遺志，補訂父親所撰嘅《潮洲藝文志》，被認為係方志史嘅里程碑。

20歲嘅饒宗頤入咗廣東通志館任纂修，1949年佢移居香港，先後喺中文大學、香港大學、新加坡大學、美國耶魯大學等著名學府任教，同時致力研究甲骨文、敦煌手卷同宋詞。饒宗頤出版嘅學術研究著作超過100種，代表作有《殷代貞卜人物通考》、《甲骨文通檢》、《敦煌書法叢刊》、《梵學集》、《楚帛書》等。饒宗頤話自己之有機會去歐洲各國接觸新事物同專注做自己嘅研究，唔受約束，就係因為佢喺香港大學教書。香港嘅自由環璄，令饒宗頤得以避過內地早期嘅政治動蕩，亦令佢得以結交來自唔同國家嘅專家，一起研究交流，譬如法國著名漢學家汪德邁。

饒宗頤嘅冶學範圍極廣，精通多國文字，汪德邁讚饒老係「行走嘅圖書館」。除此之外，饒老嘅書畫都係一絕。呢啲成就唔單止要靠饒宗頤嘅超強記憶力，仲歸功於佢嘅勤奮。曾任饒宗頤助手嘅鄭煒明話，饒教授六、七十歲時，夜晚9點幾10點就瞓覺，然後凌晨2點起身工作，每晚最多都係瞓5個鐘。除咗勤力，享受孤獨同樣重要，「做學術的人，應養成一種孤獨感，因為不孤獨的話，時間便不夠用，無法集中精力做事。」

圖片嚟自網絡。