一副墨鏡、一頭白髮馬尾，加上一身黑西裝， CHANEL創作總監「老佛爺」Karl Lagerfeld嘅標誌裝束，相信好多人都見過。老佛爺一手將CHANEL打造成國際品牌，係繼品牌創辦人Coco Chanel之後，帶領住依個時裝王國再次走向高峰。一代傳奇人物離世，今日同大家簡要咁回顧吓佢嘅一生。

老佛爺生於德國漢堡，14歲搬咗去巴黎，開始學素描。佢二十出頭已經响時尚界展露鋒芒，於1954年國際羊毛標誌大獎嘅外套組入面贏咗，而晚裝組嘅冠軍係另一位時裝大師聖羅蘭（Yves Saint Laurent），相信嗰年比賽嘅設計相當精彩。後嚟老佛爺响六十年代加入著名時裝品牌Fendi，到1983年做埋CHANEL創作總監，第二年再用自己個名開創個人品牌。

老佛爺曾經响唔少著名地標舉行時裝騷，包括2007年10月於北京一段蜿蜒而下嘅長城段搭建T台，啲模特兒著住高踭鞋行落嚟，多數都行到震吓震吓，認真經典。

除咗時裝，老佛爺嘅形象亦係唔少影視題材嘅參考，好似陳豪早兩三年响《潮流教主》入面就曾經扮過老佛爺，嗰道氣場都有啲似。

原圖嚟自網絡。