提起趙國名將廉頗，大家可能會第一時間諗起「負荊請罪」呢個成語，同埋《廉頗藺相如列傳》入面，佢同趙國上卿藺相如由仇敵變成好友過程。不過呢啲已經屬於廉頗後生果陣嘅事蹟喇，佢老咗之後呢？夜晚有睇開《皓鑭傳》嘅史友應該會發現，趙國被秦國圍攻，而趙國大將廉頗就堅守城牆，無論秦軍如何叫囂、挑釁都唔應戰。歷史上的確真有其事，而呢個時候嘅廉頗已經五十幾歲。

廉頗只守不戰自然有佢嘅理由，但趙孝成王就唔多信佢，仲換咗名將趙奢之子趙括取代廉頗。趙括就係成語「紙上談兵」嘅主角，所以可想而知，佢唔係個擅長實戰嘅人，幾次指揮趙軍被秦軍打到落花流水。後嚟趙國都係靠楚國、魏國來救，趙國先解到秦國之困。跟住到燕國嚟犯，趙孝成王都係要請返廉頗出山。可惜趙孝成王死咗之後，佢嘅仔悼襄王繼位，命前燕國大將樂承取代廉頗，廉頗一怒之下打走咗樂承，自己逃咗去魏國。

廉頗去咗魏國之後，趙國又被秦軍圍困，趙悼襄王咁先醒起廉頗嘅好，派使者去魏國睇睇老咗嘅廉頗仲可唔可以上戰場。廉頗見到趙國使者，為咗表現自己老而彌堅，食咗一斗米同十斤肉，仲披甲上馬，不知幾精神。點知個使者早就被廉頗嘅政敵收買，返到趙國之後，居然老屈廉頗係就係好食得，不過一餐飯入面就去咗三次廁所。搞到趙悼襄王認為廉頗老喇，唔中用，就無請廉頗回國。呢件事亦係南宋詞人辛棄疾果句「廉頗老矣，尚能飯否」嘅來源。廉頗一身本領同報國熱誠都付諸流水，即使後嚟去咗楚國做將軍都無建樹，最後客死異鄉。

圖為《皓鑭傳》劇照，原圖嚟自網絡。