早前同大家講過葉問、黃飛鴻等知名嘅南派武術宗師，今日再同大家介紹多位，佢就係蔡李佛拳嘅始創人陳享。

陳享係廣東新會人，自幼就跟隨族叔陳遠護學習佛家掌拳，之後拜廣東五大名拳之一嘅「李家拳」創始人李友山為師，學習跌打、五行拳、棍法同腿功。跟住，陳享仲上埋羅浮山白鶴觀，跟住由少林還俗嘅蔡福學拳添。有名師指點，都要自己爭氣，陳享將幾位老師嘅拳法融會貫通，創編咗一套包含蔡家拳、李家拳、佛家掌嘅拳法，為咗記念幾位恩師，陳享直接將套拳法稱為「蔡李佛拳」。

30歲嗰年，陳享喺鄉下開咗第一間武館——「洪聖館」，之後幾年仲指派門生去廣東、廣西各地設館達四十幾間，令蔡李佛拳聞名南方。不過，陳享後嚟因為有份參與紅巾軍起義而被清廷通緝，搞到要走難落嚟香港再輾轉去南洋。喺香港停留期間，陳享仲收咗個徒弟張炎添。

陳享晚年返家鄉，將一生所學好好整理，仲著書立說，令蔡李佛體系更為完善。蔡李佛拳有幾勁？阿史唔識打功夫真係答唔到，不過蔡李佛拳喺2008年列入國家級非物質文化遺產保護目錄，係目前廣東省唯一獲非物質文化遺產嘅武術項目，單憑依樣，已經夠曬威水。

圖為當年洪聖館嘅所在地緣福陳公祠，原圖嚟自網絡。

部份資料嚟自《廣府天地》。