中環有維多利亞式建築群？

見到圖中張相，估唔估到就係香港嘅核心商業區中環呢？其實响八十年代之前，中環嘅商業區有好多好靚嘅維多利亞式建築，絕對可以媲美倫敦。

阿史早幾日同位老前輩飲茶，由於佢以前長時間响中環返工，所以就講咗好多以前中環嘅故事。老一輩嘅香港人應該都會記得中環有好多好出名嘅英式建築，除咗香港會同郵政局外，其實仲有公爵行，娛樂行，華人行，告羅士打行，聖佐治行，英皇行，於仁行等等。

不過咁，呢啲咁有特色嘅建築，點解會依家會得返個名呢？如果要怪，可能先要怪港英政府，特別係麥理浩在任港督期間，香港九龍因為發展關係好多建築物拆咗，好似計劃中環起地鐵，唔單止拆咗政府建築物，仲搞到唔少地產商一齊拆埋一份。另一班要怪嘅人就應該係當時嘅地產商。香港一直都係奉行高地價政策，隨住香港經濟起飛，地價係咁升，好多擁有呢啲舊式建築物嘅地產商都寧願拆咗重建嚟賺大錢。