唔知大家喺十幾年前有無入戲院睇過湯唯同梁朝偉嘅電影《色，戒》呢？呢套戲係根據民國傳奇女作家張愛玲嘅同名短篇小說改編，呢篇小說當中仲有唔少情節同場景提到香港，導演李安仲特登嚟香港取景拍攝。其實除咗《色，戒》之外，張愛玲嘅另一部作品——《傾城之戀》都同香港有好大淵源。

1939年，張愛玲拎住倫敦大學嘅獎學金，本嚟係準備去英國留學嘅，點知因為第二次世界大戰爆發，佢輾轉嚟到香港大學文學院求學。喺香港，張愛玲參加咗雜誌社嘅徵文比賽，憑住《天才夢》攞獎，自此開始文學創作之路。張愛玲嘅代表短篇小說《傾城之戀》，其實係因為香港被日軍侵佔而創作。喺小說入面，男主角范柳原同女主角白流蘇嘅關係一直處於曖昧、互相試探嘅狀態，就係因為戰爭爆發，兩人先意識到彼此嘅重要性，而坦然面對呢段感情、交付真心。

响現實當中，張愛玲曾經遇過日軍侵華帶嚟嘅衝擊，當時一個炸彈喺佢住處嘅對面街爆炸，佢僥倖死裡逃生。佢曾經喺作品中描述過呢次經歷：「差點炸死了，卻沒人可告訴，若有所失」。除咗《傾城之戀》、《色戒》之外，張愛玲嘅代表作《沉香屑：第一爐香》、《沉香屑：第二爐香》、《燼餘錄》都係以香港為創作背景嘅小說，喺香港嘅經歷同生活對張愛玲嘅影響之深可見一斑。

圖為香港大學、《傾城之戀》劇照同張愛玲，原圖嚟自網絡。