之前講開香港商人邱德根經營荔園嘅事跡，今日就講埋佢同亞視嘅故事。邱德根當年入主亞視，令公司轉虧為盈，相信同佢節儉慳家嘅管理作風有好大關係。

邱德根喺1982年全面收購麗的電視，將其易名為亞洲電視，製作播出嘅亞洲小姐選舉、《秦始皇》、《滿清十三皇朝》等節目大受歡迎，同當時嘅TVB絕對有得揮。至於管理方面，有傳聞話邱德根曾經規定員工去廁所只可以用兩格廁紙、農曆新年派利市就用代用券嚟代替現金、只開一部電梯等大家上落等，不過有人解釋，廁紙規定屬於謠傳，亦都有朋友收過真金白銀嘅利是，至於電梯方面，其實只係週末少人啲先會咁做。邱德根開源節流，目的係達到收支平衡，佢話事期間，造就出亞視少見嘅盈餘時期。

講到其中一樣令邱德根自豪嘅，係開辦亞洲小姐選舉。香港嘅選美賽事過往都係TVB壟斷，不過邱德根唔甘心，1985年首次舉辦亞洲小姐，多年嚟選出黎燕珊、利智、翁虹、吳綺莉、羅霖、葉玉卿等明星，令亞洲小姐當年同香港小姐鬥餐飽。去到八十年代尾，邱德根將亞視賣畀鄭裕彤同林百欣合組嘅財團，令亞視易主。

圖為亞視員工幫邱德根慶祝85歲大壽圖，原圖嚟自網絡。