一場暗殺，舉國震驚。喺1913年，中國近代民主革命家宋教仁領導國民黨贏出第一屆國會選舉，成為議會最大黨，宋教仁將以最大黨黨魁身份成為總理，並且籌組內閣。不過佢同所屬黨派嘅勝利，最後居然要用性命嚟交換。

按照《臨時約法》嘅政治構架，袁世凱嘅職位大總統屬於虛職，實權係由內閣總理掌握，換言之宋教仁係威脅到袁世凱嘅地位。喺同年3月20日夜晚，宋教仁準備由上海火車站出發去北京見袁世凱嘅時候，突然被一個叫武士英嘅槍手從後襲擊，宋教仁中槍倒地，送院兩日之後不治，31歲就英年早逝。

多年來對邊個策劃暗殺宋教仁一案講法多多，其中一個說法就話係袁世凱指使，革命派嘅黃興嘅輓聯更寫明：「前年殺吳祿貞，去年殺張振武，今年又殺宋教仁；你說是應桂馨，他說是趙秉鈞，我說卻是袁世凱」，將矛頭直指大總統。而宋教仁遇襲身亡後，孫中山號召討伐袁世凱，引爆「二次革命」。

原圖取自網絡。