上次講到香港首位華人爵士何啟曾經喺香港西醫書院授課，其實國父孫中山亦曾經係佢嘅學生，而何啟除咗傳授孫中山學術上嘅知識之外，仲係對方嘅革命嘅啓蒙老師。唔講唔知，港姐冠軍張嘉兒同何啟都有淵源，皆因佢嘅老公Nathan係何啟嘅曾曾曾外孫。

講返孫中山先，佢喺香港西醫書院求學時期，讀過何啟講授嘅法醫學、生理學兩門課程，成績都好優異。學業之外，師生二人對時事嘅見解亦好投契，呢件事要望返1887年，晚清政治家曾國藩之子曾紀澤喺英國倫敦《亞洲季刊》發表嘅《中國先睡後醒論》講起。

當時篇文一出，即刻喺國內外引起強烈反響。同年四月，何啟以「華士」為筆名，用英文寫咗《中國之睡與醒——與曾侯商榷》嚟回應曾紀澤嘅文章，駁斥曾紀澤以發展軍事工業為主嘅改革觀點並唔能夠將中國帶入富強文明。受到何啟思想嘅影響，孫中山開始走上革命之路，佢曾經喺1889、1891、1894年先後三次上書清廷，闡述佢嘅改革主張。孫中山喺領導護法運動果陣，曾親口同何啟嘅女婿傅秉常講起「自己受惠於何啟之教」。

何啟本身都有份參與同策劃廣州起義嘅籌備工作，又陸續發表咗一系列政論文章，闡述對中國當代政治嘅改良主張。佢仲同思想家好友胡翼南合著文章，批評時政，倡導政治改革，反對張之洞嘅「中體西用」之說，力主西學。

圖為何啟、孫中山及署理港督施勳合照，原圖嚟自網絡。