講起中國近代史上對中國人影響最大、最深遠嘅作家，第一個肯定要提魯迅。香港人對佢亦唔會陌生，佢嘅作品好似《孔乙己》等等，經常喺教科書、課外閱讀文章甚至公開考試出現。至於點解魯迅喺中國文壇有咁崇高嘅地位？宜家就同大家講講。

魯迅，原名周樟壽，1898年改名做周樹人，係浙江紹興人。魯迅出生喺一個做官、經商嘅大戶人家，自小頭腦靈活。後嚟家道中落，父親病逝，魯迅輾轉搬遷，先後於南京同江南讀書。1902年，魯迅由江南督練公所派赴日本留學，就讀東京弘文學院，兩年後入讀仙台嘅醫科專門學校。講到呢度，大家都可能有個問題：魯迅本嚟係讀醫嘅，點解後嚟放棄咗醫科做咗文學家？

根據魯迅喺《呐喊》嘅自序話，初頭讀醫係因為父親嘅死同中醫無能有關，所以佢想學西醫嚟救同樣被中醫耽誤嘅病人。但係，自從佢喺日本留學期間，喺段影片入面見到一班中國人面無表情咁望住被圍喺中間、就嚟被日軍斬首嘅同胞果陣，旁觀中國人果種麻木嘅神情令魯迅相當震撼。佢深深體會到，學醫救到嘅不過係人嘅肉體，而佢哋嘅精神就必須靠提倡文藝運動嚟救。

就係咁，魯迅棄醫從文，喺1918年5月，佢首次用「魯迅」呢個筆名，發表咗中國現代文學史上第一篇白話小說《狂人日記》，一針見血咁控訴封建禮教會「吃人」嘅真相，啟迪國民去尋找新嘅出路。呢篇小說奠定咗之後新文學運動嘅基礎，而魯迅後嚟陸續發表嘅《藥》、《阿Q正傳》、《祝福》、《傷逝》等作品都引起咗廣大中國人嘅共鳴，對之後嘅新文化、新思想運動起到重要影響。

原圖嚟自網絡。