中國國家隊喺羽毛球、乒乓球、體操方面，一直以來都取得好好嘅成績，劉國梁、孔令輝、劉璇等唔單止粒粒皆星，仲包攬過多面體育金牌。講開體育冠軍，究竟中國體壇第一個世界冠軍係邊個？答案就係乒乓球手容國團喇。

容國團1937年生於香港一個貧苦嘅海員家庭，由於爸爸係工聯會屬下海員工會會員，所以佢成日去工聯會俱樂部嘅康樂館度打乒乓波，曾經代表工聯會參加全港乒乓球錦標賽，仲拍住隊，囊括男子團體、單打同雙打三項冠軍。有次日本乒乓球隊訪問香港，佢仲爆冷打贏咗日本嘅世界冠軍狄村。

喺1957年尾，容國團返到內地，去咗廣州體育學院訓練。經過接近一年嘅訓練，容國團得到機會參加德國多蒙特舉行嘅第25屆世界乒乓球錦標賽。喺1959年4月5日，容國團對戰贏過7次世界冠軍嘅匈牙利乒乓球手西多，第一盤輸19∶21，之後以21:12、21:15連贏兩局，到第四局，佢以21∶14再取一城，以總局數3∶1勝出，贏得男子單打冠軍，兼成為中國首個世界性體育賽事嘅冠軍。當時只有21歲嘅容國團得到「民族英雄」式嘅禮遇，返國時獲得時任國務院副總理賀龍親自到機場接機，令佢當時成為中國年輕人嘅偶像。

圖片為容國團贏冠軍後回國，取自網絡。