夜晚有睇開《皓鑭傳》嘅史友，對「白起」呢個名一定唔會陌生，因為佢就係喺長平之戰入面坑殺咗幾十萬趙人嘅秦國將領，嗰一場仗打到趙國元氣大傷。一講起依個話題，成班同事七嘴八舌，有人話佢好殘忍，有人就話佢嘅目的係為咗震懾趙國同其他諸侯國，仲有同事話係秦國唔想養咁大批敵軍，以免被食窮等等。

講起白起呢個名，絕對係戰國入面令敵對陣營聞風喪膽嘅大名，因為佢所向披靡，被傳為「戰國四大名將」之一。白起曾經大敗楚軍，一路殺入楚國國都，令楚國一蹶不振。至於喺長平之戰入面，白起對戰趙國廉頗，不過廉頗被撤換，變成「紙上談兵」嘅趙括。《史記》記載，當時趙國十五歲以上嘅男丁都去曬長平，不過最後都唔夠秦國大，戰敗收場。

趙括當時率領四十幾萬趙軍投降，但係白起認為趙軍反覆，一個唔覺意分分鐘會反咬一啖，於是有殺錯無放過，坑殺超過四十幾萬趙軍，放生二百幾人返趙國報喪。呢單歷史血案震驚咗成個趙國，國力亦因此戰迅速消退。

長平之戰後，趙國雖然逃過咗亡國嘅命運，但後嚟秦王又想派白起攻打趙國。今次白起一早就知打唔贏，於是詐病唔去，秦王一怒之下就將白起由武安君貶為庶人，仲放逐出境。同白起有過節嘅秦國丞相范雎乘機落井下石，話白起被貶，心生不忿仲口出惡言。秦王聽完之後嬲爆爆，賜劍俾白起要佢自盡。白起諗起自己喺長平之戰坑殺趙兵嘅事，覺得自己罪孽深重，最後自刎而亡。

圖為《皓鑭傳》劇照，原圖嚟自網絡。