早幾日講完戰無不勝嘅秦將白起，今日就講埋同佢有牙齒印嘅秦國丞相范雎。范雎本嚟係魏國大夫須賈嘅家臣，因為被須賈誤會佢叛國而受盡凌辱，最後不得不改名換姓，周圍匿。不過係真金就點都會發光發亮，范雎後嚟被秦國使臣賞識，推薦佢俾秦昭王。范雎到咗秦國之後，都唔係一帆風順，等咗成年幾先見到秦昭王，向佢提出咗著名嘅「遠交近攻」戰略。

咩係遠交近攻？范雎向秦昭王分析當下各國嘅局勢，話韓國、魏國位處中心，又鄰近秦國，所以如果要稱霸天下就要先收服韓、魏。方法係先利用楚國、趙國嘅矛盾，令兩國分別爭住親近秦國，咁樣一嚟，齊國就肯定會乖乖地、唔敢搞事。好喇，搞掂遠啲嘅國家之後，再嚟處理韓、魏兩國嘅事。對住魏國，秦國可以先俾啲甜頭去拉攏，唔得嘅話就割啲城池賄賂，再唔得就可以出兵討伐。至於韓國，只要出兵攻打滎陽，就可以將韓國一分為三，咁樣韓國自然會俯首稱臣。秦昭王跟住范雎嘅建議，果然令韓、魏臣服，自此范雎一路平步青雲，最後成為秦國相國。後嚟秦始皇嬴政統一六國，都係用呢招，而「遠交近攻」亦成為兵書《三十六計》嘅其中一計。

圖為《皓鑭傳》劇照，原圖嚟自網絡。