前排睇咗五四運動一百週年圖片展，其中有一張《時局全圖》以前讀書都睇過，地圖上嘅熊、狗、蛙、鷹、太陽同腸，分別代表俄國、英國、法國、美國、日本同德國，反映20世紀初列強試圖從四方八面瓜分中國嘅緊張局勢。《時局全圖》可能唔少人見過，咁大家又知唔知張圖嘅作者係革命黨人謝纘泰？

謝纘泰原籍廣東開平，1872年生於澳洲悉尼，喺當地接受小學同初中教育，並且信奉基督教，再加上佢爸爸謝日昌立志反清復明，所以謝纘泰自細就立志推翻滿清、改革中國。到咗1887年，謝纘泰就跟媽媽喺香港定居、入讀中央書院，認識唔少愛國之士。

喺1892年，謝纘泰同楊衢雲等人創立輔仁文社，開通民智、宣揚反清思想，而《時局全圖》就係响1898年7月，首次於《輔仁文社社刊》刊登。謝纘泰其後加入孫中山創立嘅興中會，並策劃1903年廣州起義，可惜失敗收場，從此佢就退出革命前綫工作，創立《南華早報》。另一方面，佢亦都推動成立香港婦女天足會，反對纏足，可以話係對社會改革不遺餘力。

部份圖片取自網絡。