之前講戰國時期嘅趙國大將廉頗時，都提過吓剩係識「紙上談兵」嘅趙括，佢代替廉頗指揮趙軍對抗秦軍，大敗，搞到趙國差啲滅國。而喺趙括被任命做將軍上陣之前，其實發生過一段小插曲。話說趙括嘅父親趙奢係著名大將，趙括自細跟住父親學兵法，雖然趙括面對爸爸出嘅難題對答如流，但趙奢就一啲都唔滿意，趙太就問點解喇。趙奢就話，戰場係個死地，但趙括就講到天花龍鳳，趙國唔用佢由自何，一用佢就肯定輸到渣都無得剩。

趙太暗暗記住咗呢番說話，後嚟趙王派趙括代替廉頗果陣，趙太即刻將老公果番話講俾趙王聽，仲話趙奢同趙括兩父子一啲都唔似。以前趙奢收到賞賜都會分俾手下，一接到軍令就專心出戰，唔會過問屋企嘅事。而趙括就唔同，一上任就要下屬朝拜佢，收到嘅賞賜就全部自己私藏，仲周不時睇睇有無平嘅筍盤買入。不過趙王唔聽勸，一意孤行要用趙括，趙括媽媽唯有退而求其次，問趙王：假若趙括做得唔稱職，可唔可以唔好誅連佢。趙王應承咗。結果趙括媽媽一語成讖，喺長平之戰裡面，趙括被秦軍射殺，而趙軍幾十萬投降嘅士兵亦被坑殺，趙國可謂再無翻身之日。本嚟趙括媽媽都被誅連，但因為先前趙王對佢許下嘅承諾，最終倖免於難。

圖為《大秦帝國之崛起》劇照，原圖嚟自網絡。