唔知大家細個果陣有無背過《三字經》？講起《三字經》，大家可能只係諗起：人之初，性本善，性相近，習相遠。可以做到咁膾炙人口嘅效果，已經相當唔簡單，究竟本嘢嘅作者係邊位？佢就係宋末嘅區適子。

區適子係佛山順德人，出生於書香世家，佢年紀小小就識作詩文、博通經史，有「神童」之稱。區適子所寫嘅《三字經》係一本傳播儒家思想、啓蒙小朋友嘅識字讀物。呢本書之所以成為經典，係因為佢脫離咗以前嘅啓蒙讀物果種一本正經、充滿說教口吻嘅傳統，而係利用生動有趣嘅歷史故事同經典嘅人物形象，例如孟母三遷、孔融讓梨等嚟貫穿全書，以小朋友喜好嘅故事嚟導人向善、自強不息，最後再用精警名句結尾，好似「玉不琢，不成器」咁，精要易記。

除咗《三字經》之外，區適子仲著有《登州詩集》、《綺業集》等，不過歷經幾百年洗禮，宜家只係剩返《三字經》得以傳世，正正符合咗區適子離世前嘅意願：「人遺子，千萬金，我遺子，惟一經。」

原圖嚟自網絡，資料嚟自《文化傳承•佛山》。