民國時期，大總統袁世凱二子袁克文、末代皇帝溥儀之族兄溥侗、河南都督張鎮芳之子張伯駒、奉系軍閥張作霖之子張學良，四人被合稱為「民國四公子」，而袁克文可以話係四公子之首，佢嘅人生故事更有濃厚嘅傳奇色彩。

袁克文生於1889年，媽媽係袁世凱三姨太、朝鮮公主金氏，由於袁世凱大姨太無仔女，袁克文細細個就過繼咗俾大姨太，而大姨太亦都非常愛錫袁克文。袁克文作詩、填詞、寫文樣樣皆精，袁世凱亦非常偏愛佢。不過二人嘅寵愛導致袁克文形成揮霍、任性嘅性格，嫖賭飲吹樣樣掂，陋習纏身。袁克文除咗元配劉梅真之外，仲有好幾個妾侍，據講佢中意過嘅靚女有成七八十個，認真無本心。

「絕憐高處多風雨，莫到瓊樓最上層」，真係詩詞咪亂作，袁克文依句作品被認為係反對帝制，激嬲爸爸袁世凱，亦有另一個講法係袁克文同袁世凱嘅妾傳出緋聞，於是就走佬去咗上海。袁克文喺上海拜青幫大佬張善亭為師，排喺「大」字輩，輩份比「上海三大亨」黃金榮、張嘯林及杜月笙高一至兩輩，主要因為佢有錢同埋爸爸嘅身份。其實袁克文都好識做，將十個紀念袁世凱做總統嘅黃金紀念幣送俾黃金榮做見面禮，據講杜月笙見到啲紀念幣都好鍾意，黃金榮就轉送三個俾佢。

「入得青幫，上得青樓」，成為青幫大佬嘅袁克文後嚟喺上海灘出入歡場，過住醉生夢死嘅生活。喺1931年佢患上猩紅熱，最後因病逝世，終年42歲，死後竟然有4000幾個僧尼道士同過千妓女自發送佢最後一程，仲有北洋政府總統徐世昌、國民黨元老于右任等等送別，場面墟冚。

原圖取自網絡。