香港大學嘅創辦，除咗多得時任港督盧吉同商人麼地之外，仲有一個幕後功臣不得不提，佢就係著名作家張愛玲文章中嘅「滿清遺老」、清朝兩廣總督張人駿。張人駿係張愛玲父親嘅堂兄，所以張愛玲叫佢「二大爺」。張人駿19歲中進士，為人聰明、謹慎，官途亦頗為順暢，一路扶搖直上，於同治、光緒、宣統三朝深得重用。

1908年，當盧吉準備籌備開辦香港大學之初，資金嚴重不足，盧吉號召社會各界人士捐輸之後，資金仍然唔夠。張人駿作為當時嘅兩廣總督，以個人名義捐咗20萬港幣，足足佔咗所籌得經費嘅一成半。喺張人駿嘅帶動下，各界捐款源源而來，令辦學資金得以籌足。張人駿仲出資喺港大設立25個獎學金，鼓勵學生努力讀書，比後嚟孫中山喺港大建立嘅5個獎學金為多，所以張人駿可以話係香港大學奠基人之一。

除咗支持香港大學創辦之外，張人駿仲喺廣州建立一間無線電報學校，仲大力支持西醫建立廣州光華醫學堂等，為近代教育事業嘅發展貢獻良多。

圖為張人駿同張愛玲，原圖嚟自網絡。