周星馳主演嘅電影《功夫》相信有唔少史友睇過，入面有個幫派叫斧頭幫，陳國坤飾演嘅幫主琛哥個樣寸寸貢，但自己本身又唔打得，成日要靠請外援嚟做打手。其實斧頭幫唔係星爺作出嚟嘅，而係真有其事，真實嘅斧頭幫幫主王亞樵仲好把炮添。

王亞樵係安徽合肥人，考過科舉，成績仲好好添。由於家境麻麻地，王亞樵自細就受盡地主、官吏欺凌，呢啲經驗對佢往後做嘅事有好大影響。1911年辛亥革命爆發，清政府被推翻，受到孫中山事蹟啓發，王亞樵亦召集咗一班同鄉，喺合肥成立革命軍政府。當然，王亞樵想令合肥獨立嘅想法並唔成功，孫中山後嚟派咗另一個人嚟管合肥，雙方因政見不合，最後逼到王亞樵出逃。

至於王亞樵點解會做咗斧頭幫幫主，就要由1922年佢接管咗「安徽旅滬同鄉會」講起。話說有個工人被僱主拖欠人工，上門追討唔成，仲被毒打一身。王亞樵知道後，即刻叫人去鐵匠鋪打咗100把斧頭，之後帶咗100個大隻佬直接衝去僱主屋企門口，對方見到100個斧頭人嘅陣勢已經被嚇破膽，嗱嗱聲道歉兼賠人工。自此以後，王亞樵喺上海聲名大振，佢嘅幫會亦被稱為「斧頭幫」。

王亞樵嘅事蹟梗唔止得咁少，仲有佢嘅暗殺史同抗日史都相當轟動，下次再同大家講講。

圖為王亞樵同《功夫》劇照，原圖嚟自網絡。