喺民國時期嘅上海灘，「七小姐」盛愛頤嘅名氣可謂一時無兩，因為佢係中國現代第一位將哥哥同侄仔告上法庭，以爭取自己應有嘅財產繼承權並獲勝訴嘅女性，開創宣揚男女平等、女性有合法財產繼承權嘅先例。盛愛頤拎返屬於自己嘅財產之後，仲將呢筆錢用嚟起咗之後上海灘著名嘅娛樂場所——百樂門舞廳。除咗單官司，盛愛頤同四大家族嘅宋子文亦有一段同金葉有關嘅恩怨情仇。

盛愛頤係中國第一間大學——北洋大學創辦人盛宣懷嘅女兒，年紀小小就伶牙俐齒、見多識廣，因此喺上海灘又有「盛七」嘅盛名。曾任孫中山英文秘書嘅宋子文，經胞姐宋靄齡引薦下，做咗盛愛頤哥哥盛老四嘅英文秘書，宋子文同盛愛頤就係咁而認識。宋子文曾經去美國留學，談吐得體，又有學識，好快就得到盛愛頤嘅好感，做咗盛愛頤嘅英文老師。不過，因為盛愛頤嘅母親唔係咁中意宋子文，於是盛老四就將宋子文調去武漢，宋子文亦因此機緣巧合被孫中山重用。後嚟，宋子文都係放唔低盛愛頤，專登搵返女方，想帶佢私奔去廣州。盛愛頤一個出身名門嘅千金小姐，最終都係無應承到宋子文，不過就送咗幾塊金葉俾佢做車馬費。

幾年之後，宋子文娶咗老婆，仲做埋廣州國民政府財政部長，當初反對兩人嘅盛愛頤母親又過咗身，照道理盛愛頤同宋子文都應該可以做返friend嘅。點知盛愛頤懶理兄嫂擺嘅「和頭酒」，就係唔肯同宋子文講和，仲話人哋宜家春風得意，自己都懶得去巴結，而且當年借俾佢嘅金葉子佢都仲未還！

圖為盛愛頤同宋子文，原圖嚟自網絡。