上個禮拜同大家講過斧頭幫幫主王亞樵為咗幫工人追返份糧，帶咗成百個揸住斧頭嘅大隻佬去拖糧僱主屋企門口守住，嚇到個僱主即刻道歉賠錢，王亞樵就咁喺上海打響名堂。今日阿史會再同大家講吓王亞樵點樣由斧頭幫幫主變身為民國第一殺手。

當年斧頭幫嘅聲勢日漸壯大，吸引越嚟越多人加入，而斧頭幫成員除咗幫被欺負嘅工人討回公道之外，仲有「受人錢財、替人消災」嘅任務，王亞樵每次暗殺嘅對象都唔係一般人，例如日本陸軍大將、外相等。數到王亞樵最出名嘅行刺對象，不得不提國民黨要員宋子文同蔣介石。王亞樵當年積極抗日，偏偏蔣介石控制嘅國民黨政府忙於同共產黨內鬥，同王亞樵「國共合作、打倒軍閥」嘅信念好唔同。因此，對於蔣介石嘅多次拉攏，又送錢又贈官銜咁，王亞樵都一律唔俾面，仲話「蔣光頭擁兵百萬都不抗日，我們老百姓抗日」，認真夠沙膽。

王亞樵唔止唔俾面蔣介石，仲暗地裡策劃刺殺蔣介石同埋與佢關係密切嘅人。王亞樵先係派人殺咗安徽建設廳長張秋白，同埋向蔣介石告密嘅輪船招商局總辦趙鐵橋，再派人喺廬山暗殺蔣介石，但因為殺手混亂中開槍並無射中目標，導致刺殺失敗。之後，王亞樵又安排人喺火車站刺殺財政部長宋子文，不過因為殺手擺烏龍認錯人，死嘅唔係宋子文，而係佢嘅秘書。無幾耐，蔣介石捉咗王亞樵幾個手下，知道王亞樵曾經策劃暗殺自己同宋子文不果嘅事，嬲到即刻叫軍統局局長戴笠緝拿王亞樵。王亞樵同戴笠嘅結拜關係亦因此破裂，最後逼到王亞樵扮成搬運工，混入開往香港嘅貨輪，逃離追捕。

圖為蔣介石同王亞樵，原圖嚟自網絡。