之前同大家講過北洋大學創辦人盛宣懷屋企好把炮，出咗一個創辦舊上海百樂門舞廳嘅盛家七小姐盛愛頤，就連盛家嘅保姆呂葆貞都唔惹小，生咗「趙四小姐」趙一荻，做埋西安事變發起人張學良嘅岳母。今日同大家講嘅呢位倪桂珍，都曾經係盛家嘅保姆，仲生咗赫赫有名嘅宋氏姐弟，宋氏姐弟之後仲影響咗成個中國近代史。

倪桂珍係上海浦東川沙人，父親係清末牧師,母親係明朝科學家徐光啟嘅後裔，倪家雖然唔係大富大貴之家,但門風亦算開放，倪桂珍讀過書，仲彈得一手好鋼琴添。亦因為咁，令倪桂珍可以通過嚴格篩選，成為盛家保姆。後嚟，倪桂珍嫁咗俾傳教士宋嘉樹。不過，兩公婆初初嘅經濟環境麻麻地，宋嘉樹嘅薪水微薄，要靠自辦印刷廠，承印《萬國公報》同其他英文書刊嚟維持生計，而倪桂珍就幫手校對。而呢個自家印刷廠，之後仲幫孫中山印咗好多宣傳革命嘅印刷品添。

倪桂珍兩夫婦真正發跡,係結識咗孫中山之後,兩人不遺餘力咁支持孫中山搞革命，協助佢創建「興中會」、「中國同盟會」。民國成立後,宋嘉樹負責籌建銀行等,兩公婆身體力行支援革命活動，仲先後生咗宋靄龄、宋慶龄、宋美龄、宋子文等六姐弟，三姐妹之後分別嫁咗俾中華民國財政部長孔祥熙、孫中山同蔣介石，牽動中國近代史發展。

圖為倪桂珍一家合照，原圖嚟自網絡。