唔知大家幾年前有無睇過許鞍華執導、湯唯主演嘅《黃金時代》？呢套戲當初喺各大電影頒獎典禮上有多項提名，仲拎過唔少獎，而電影講嘅正正就係「30年代文學洛神」、作家蕭紅傳奇嘅一生。

蕭紅原名張廼瑩，生於黑龍江省呼蘭縣一個地主家庭，幼年喪母，父親對佢又冷淡，只有喺爺爺身上感受到一絲溫暖同愛。蕭紅19歲嘅時候，為咗逃避屋企安排嘅包辦婚姻，同表哥私奔。但表哥最終都係向屋企妥協，蕭紅自己一個人喺飢寒交逼之下，向未婚夫汪恩申求助。

點知半年後，汪恩申留低已有身孕嘅蕭紅，自己一走了之。無奈之下，蕭紅唯有寫信向報社求救，嚟救濟蕭紅嘅蕭軍好快就同蕭紅同居，兩人過咗一段雖艱苦但不失甜蜜嘅生活。不過，蕭軍大男人、暴力，仲出軌，最終都丟低咗有身紀嘅蕭紅。同蕭軍分手之後，蕭紅又遇上作家端木蕻良，兩人後嚟結咗婚，但蕭紅因四處漂泊、經常挨餓令身體變差，年僅30歲就响香港病逝。 

其實喺感情同私人生活上，蕭紅輾轉流浪，又屢次被男人拋棄，過得好淒慘，但好在佢喺文學上遇到一生嘅貴人——魯迅。魯迅慧眼識人，睇得出蕭紅有才能，多番照顧同提攜，先令蕭紅得以踏入寫作上嘅黃金時代，發表咗《生死場》、《孤獨的生活》、《砂粒》、《呼蘭河傳》等代表作。

圖為蕭紅同蕭軍、端木蕻良合照，原圖嚟自網絡。