第一次鴉片戰爭之中，著名嘅傳奇人物除咗欽差大臣林則徐、水師提督關天培等，仲有力戰到底、為國捐驅嘅英雄──陳化成。佢歷任金門總兵、台灣總兵、廣東碣石總兵、福建水師提督、江南水陸提督等職位，更於鴉片戰爭期間坐鎮吳淞口，力抗英軍而犧牲，今日就同大家簡短回顧佢嘅一生，了解依位英雄如何於炮彈戰火之中出生入死，捍衛家國及民族尊嚴。

1776年出生嘅陳化成係福建同安縣人，年幼嗰陣就去台灣生活、讀書。陳化成22歲嘅時候加入咗水師，其後多次建功，扶搖直上，1830年獲任命為福建水師提督。當時鴉片走私船同貨棧猖獗，於是陳化成就命令水師加強巡邏，驅逐英國艦隻。到咗1840年，佢調任江南水陸提督，致力改善吳淞防務，派人採購精鐵鑄造新炮，又修築土堡掩護炮台，同時督造火藥、修整炮台同埋加強士兵操練。

英軍艦隊1842年大規模進攻吳淞口，陳化成親自上西炮台指揮，雙方互相發炮，戰況非常激烈。期間兩江總督牛鑒以為陳化成炮戰得手，就命令儀仗隊列陣、打鑼打鼓，大搖大擺咁坐住頂大轎過去吳淞，呢個時候英軍立即發炮攻擊，牛鑒人馬即時陣腳大亂，牛鑒混入亂軍中逃跑。而負責駐守東炮台嘅參將崔吉瑞亦都棄守逃走，於是英軍漸漸包圍陳化成所在嘅西炮台。

陳化成腹背受敵，加上部隊傷亡慘重，部將周世榮建議陳化成棄守逃走，但遭到陳化成拔劍怒斥，周世榮逃走之後，炮彈就好似暴雨咁打埋嚟，受咗傷嘅陳化成繼續指揮士兵戰鬥，最終噴血而亡。根據《清史稿》記載，陳化成生前曾講過，「武臣死於疆場，幸也。」足見佢為國為民嘅決心。

原圖取自網絡。