「查大俠」噚日離世，好多人都唔捨得。金庸一生結交唔少好友，當中包括另一位著名作家倪匡。倪匡同金庸相識六十載，佢形容「金庸小說，天下第一，古今中外，無出其右」，又認為就算金庸離世，佢嘅作品會一直流傳落去。

金庸既是倪匡嘅朋友，亦都係倪匡嘅老闆，倪匡就曾經喺金庸創辦嘅《明報》寫稿，而倪匡嘅《衛斯理》最初亦都喺《明報》連載。倪匡同金庸之間曾經發生過一件趣事，據講當年金庸寫《天龍八部》嘅時候，因為要去歐洲，就搵咗倪匡代筆一個月，金庸出發前叮囑倪匡唔好寫死任何一個角色。

傳聞話倪匡「好聽話」，不過佢好唔鍾意《天龍八部》嘅角色阿紫，就將阿紫寫到盲咗，兼且被游坦之愛上，雖然符合「無寫死任何角色」嘅要求，但係就搞到金庸哭笑不得。金庸返到香港之後，唯有閂埋門「收拾殘局」，後來《天龍八部》結集出書，金庸喺倪匡同意之下，大幅修改內容，唯獨就係留返阿紫盲咗呢個劇情，更利用呢一點更深刻咁刻畫出阿紫嘅任性、刁蠻，同埋游坦之之間嘅關係。不過自從呢件事之後，金庸就無再搵人代筆寫小說喇。