前排講過吓清末重臣李鴻章嘅事跡，話說佢曾經响1900年嚟過香港兩次，受到港英政府嘅高度重視。第一次訪港，係事緣佢响1900年1月去往廣州接任兩廣總督一職，期間途經香港，佢喺中環美利碼頭上岸，當時港英政府安排儀仗隊同英軍樂隊，仲鳴放禮炮迎接佢，之後李鴻章就去總督府同港督卜力、駐港英軍總司令加士居、輔政司駱克，以及議政局成員會面並共晉午餐。

當時李鴻章同卜力傾到鴉片管制、合作打擊海盜，以及九龍寨城管轄問題。喺1899年5月，駐港英軍曾經以九龍寨城內中國軍隊參與新界抗英活動為由，驅趕寨城內嘅清兵同平民，李鴻章同卜力為此事交涉，但無疾而終，而李鴻章之後就坐船去廣州上任。

同年6月，喺北京嘅慈禧太后以光緒帝名義向11國宣戰，結果搞出個大頭佛，於是就任命李鴻章做直隸總督返去「救火」，李鴻章返北京嘅時候，再次途經香港，卜力勸佢留喺廣州、促成兩廣獨立，但遭到拒絕。喺李鴻章離開香港北上嘅時候，大批民眾圍觀歡送，而李鴻章亦多次脫帽、鞠躬致意。

圖片為李鴻章第一次訪港，與香港政府官員合照，取自網絡。