唔少打工仔都經歷過辦公室飲水機無人換水嘅情況，秘書妹妹日前好勇武，話要自己換水，仲講到「女性能撐半邊天」，咁嘅情況，阿史一於精神上支持佢。講開撐起半邊天嘅女性，歷史上真係有唔少，好似前排提過提倡女性有參政權、男女平等嘅唐群英，其實佢嘅主張深受女權革命家秋瑾影響。秋瑾唔單止係光復會嘅主要領導人，佢仲積極參與革命，係提倡男女平權、促進婦女解放運動嘅革命家。秋瑾當年响體育學堂親自上陣，教學生騎馬、射擊同兵操。因為秋瑾著住男裝體操洋服，又騎住隻馬出出入入，搞到當時唔少士紳好不滿，仲為難佢添。

秋瑾原名秋閨瑾，出生喺福建閩侯一個地主家庭，精通詩詞同武藝，16歲嫁俾富商之子去咗北京，亦因此識咗桐城派作家吳汝綸嘅女吳芝瑛。秋瑾同吳芝瑛一見如故，兩人成日一齊研究維新書刊，令秋瑾產生強烈嘅愛國同救國情緒。1904年，秋瑾丟低屋企人，隻身一人去日本留學，積極參加留日學生組織嘅各種活動，創辦咗《白話報》嚟宣傳婦女解放，並重組「共愛會」呼籲有志之士反抗清廷，仲加入咗秘密團體從事反清活動。

回國之後，秋瑾先喺浙江潯溪女校任教，後嚟輾轉去紹興督辦大通體育學堂。秋瑾喺大通學堂開設體育特別班，專門用嚟訓練革命義士，加強學生嘅軍事訓練。除此以外，秋瑾仲係紹興倉橋設立體育會，擔任會長，訓練一隊女國民軍。

圖為秋瑾像同大通學堂，原圖嚟自網絡。