喺國共內戰末期，南京政府濫發紙幣，導致惡性通貨膨脹，統治區內百業凋敝、民生艱困，開始出現反肌餓、反內戰嘅浪潮。喺1948年8月，國民政府決定推行一系列嘅經濟改革，包括發行金圓券、限制物價同埋收兌人民所持有嘅金銀、外幣等。當時嘅總統蔣介石派兒子蔣經國出任經濟管制督導員嘅助理，去上海「打老虎」，打擊囤積居奇嘅奸商、有錢人同大官僚。但嗰次行動牽連到四大家族之一嘅孔家，蔣介石同夫人宋美齡決定包庇，成個經濟改革維持咗70日就結束，蔣經國最後黯然離開上海。

喺1948年9月尾，上海警方收到報告，指英商利喴公司汽車行囤積大批物資，當局調查之後發現物資均屬於前行政院院長、中國銀行董事長孔祥熙同宋藹齡個仔孔令侃所開設嘅揚子建業公司擁有。當局查封所有物資之後，媒體大肆報道，孔令侃之後致函蔣經國交涉，指揚子建業公司營業額唔多，而且嗰批物資早已向社會局登記。蔣介石夫人、孔令侃阿姨宋美齡專誠去到上海，叫埋蔣經國同孔令侃坐定定調解，點知兩表兄弟鬧交收場。唔單止咁，件事仲驚動南京嘅監察院，令趕到上海嘅蔣介石阻止監察院調查。

蔣介石出手介入，自然令風向有所轉變，最後行政院取消限價政策，警方亦宣布揚子公司已向社會局登記，令案件不了了之。蔣經國之後發表《告上海人民書》，承認自己未能盡責完成任務，更增加人民痛苦，最後喺11月6日辭去職務。事件之後亦迅速發酵，令國民黨同政府受到廣泛批評。

圖為蔣經國、孔令侃，取自網絡。