前排講開清朝皇帝嘅密折，提到平時好勤政、嚴肅嘅雍正，回覆大臣嘅內容直白又㜺鬼，其中以佢寫俾重臣年羹堯嘅奏折最骨痹，大意係話你係朕嘅恩人，朕實在唔知點樣報答你之類，仲話想將兩人當做千古君臣嘅榜樣咁話。點知只係過咗一年，年羹堯就變成罪人，賜死獄中，而雍正責怪佢嘅其中一個理由，居然係因為佢寫錯字？

 年羹堯嘅妹妹，早喺雍正被封雍親王之時就嫁咗俾雍正做側福晉，所以年羹堯同雍正既係親戚又係舊識。雍正登基之初，底下有八王黨對皇位虎視眈眈，青海又有叛亂，雍正於是起用年羹堯，叫佢接任撫遠大將軍，坐鎮西寧指揮平叛。而年羹堯不負所托，迅速喺軍中建立威望，順利平定叛亂。一出師就立大功，雍正梗係對年羹堯格外恩典，除咗珍品之外，更賜予佢至高無上嘅權力。

至於年羹堯之死，主要原因就係因為年羹堯恃住雍正重視，就開始作威作福，收受賄賂、結黨營私、目無君臣之禮等都觸犯咗雍正嘅逆鱗。加上彈劾年羹堯嘅奏折陸續有嚟，令雍正下定決心懲治年羹堯。據《清史稿•年羹堯傳》載，雍正三年出現咗日月合璧、五星聯珠嘅祥瑞，群臣稱賀，年羹堯亦上賀表稱頌雍正，但表中字跡潦草，又將「朝乾夕惕」寫成「夕惕朝乾」。雍正捉住呢個把柄借題發揮，話年羹堯本嚟唔係咁粗心嘅人，今次嘅錯明顯係年羹堯自恃己功，對雍正不敬。於是，年羹堯嘅勢力被一步步削減，朝廷議政大臣仲向雍正提交年羹堯嘅審判結果，列出92條大罪。最終年羹堯喺獄中自裁，嫡親子孫發配邊地充軍，父兄族中有官職嘅皆被革職，家破人亡。 

圖為雍正、年羹堯畫像，原圖嚟自網絡。