十九世紀嘅香港，唔少外國元首政要都會不時到訪香港，好似之前上次講過嘅只愛美人不愛江山嘅威爾斯親王愛德華王子咁。而今日講嘅主角、英國維多利亞女王嘅外孫德國海因里希王子都有嚟過香港，佢仲同香港首位華人律師伍廷芳有過一面之緣添。

海因里希王子係德皇威廉二世嘅親細佬，身份尊貴，不過王子當年只係以海軍學校實習生嘅身份訪港。1880年，王子乘搭阿爾伯特親王號由上海抵達香港，喺香港逗留咗成個月，期間仲去咗廣州訪問。時任港督軒尼詩夫婦曾邀請王子到港督府共進午餐，席上除咗有香港政、商、軍界嘅代表，仲有首位華人律師、華人議員伍廷芳。

另一個有趣嘅插曲係，海因里希王子訪港期間遇著維多利亞女王生日，但當時軒尼詩就住港島軍事用地事宜同英軍司令多諾曼中將有爭執，搞到多曼諾中將唔肯借軍樂團去總督府慶祝英女王生日，而咁啱王子應邀參加呢個英女王慶生晚宴，最後英國代表為咗避免外交上嘅失儀，唯有放低爭拗，依約借出軍樂團，令晚宴順利舉行。

圖為海因里希王子同軒尼詩，網上圖片。