之前講完林徽因同徐志摩，阿史今日再同大家講講林徽因同金岳霖。金岳霖係民國首屈一指嘅哲學家，佢擅長邏輯學，之前預科時代必讀嘅《人生的意義》嘅作者殷海光，就係金岳霖嘅學生。

金岳霖終身未娶，好多人都話係因為林徽因，的確，佢對林徽因用情至深。但其實佢同林徽因夫婦之間嘅關係有啲微妙，照道理，佢同梁思成係情敵，無理由會相處融洽，但偏偏佢哋幾十年嚟都係住隔離而相安無事，金岳霖更加係兩口子嘅座上常客。有時，林徽因夫婦嗌交都係搵金岳霖做仲裁調停。林徽因生前，金岳霖「逐林而居」，林徽因住邊，佢就搬去邊住。就連林徽因死後，金岳霖都住喺林徽因兒子梁從誡隔離，待如親子，而梁從誡夫婦對金岳霖敬愛有加，尊稱佢做「金爸」。

林徽因死後多年，金岳霖都係放唔低女方，有一日，向來低調嘅金岳霖隆重其事咁請齊一眾好友去北京飯店赴宴，眾人不解，金岳霖就解釋：「今天是林徽因的生日！」仲有一次，出版社嘅記者因要編纂林徽因嘅詩文集，搵到金岳霖，拎出一張林徽因嘅相俾金岳霖睇，想問吓佢關於呢張相嘅拍攝背景。點知金岳霖望住張相嘴角微微向下彎，好似想喊咁，仲好似小朋友咁求記者俾張相佢。

喺林徽因嘅追悼會上，有一副金岳霖寫嘅挽聯：「一身詩意千尋瀑，萬古人間四月天」，「人間四月天」嚟自林徽因嘅詩《你是人間四月天》。不過，金岳霖終身未娶並唔完全係因為林徽因，佢同著名記者浦熙修曾經到咗談婚論嫁嘅階段，點知文革中浦熙修被打壓，兩人嘅婚事就不了了之。

網上圖片