電視台宜家播緊《包青天再起風雲》，將北宋名臣包拯嘅故事再一次呈現喺觀眾面前。電視劇成日都話包青天為官清廉，不畏強權，其實真實嘅包拯亦敢於挑戰權貴，曾經6次上書彈劾宋仁宗愛妃張貴妃嘅伯父張堯佐。包拯到底係正直不阿定係堅持不懈定係無懼權貴？相信幾樣都係。

話說張貴妃出身一般，但就因為生得靚而備受寵愛。佢恃住自己得寵，喺宋仁宗耳邊吹風，加上宋仁宗愛屋及烏，於是破格提攜張貴妃嘅伯父張堯佐，令張堯佐升官好似揸火箭咁。但其實，張堯佐為官麻麻，無乜作為，咁升法梗係惹起其他人不滿喇。包拯曾經做過張堯佐手下，發現張堯佐唔止無做正經嘢，仲恃住背後有張貴妃撐腰，成日肆意妄為，於是聯合其他諫官彈劾張堯佐才能平庸，唔配咁高職位。

點知宋仁宗無理會不特止，反而又升張堯佐，包拯無放棄，隔幾日又上奏一次，宋仁宗索性唔回覆。包拯第三次彈劾張堯佐破壞咗升官制度，群臣不服，宋仁宗都係企硬，有官員甚至威脅辭官。宋仁宗依然無行動，但回宮之後就對張貴妃大發脾氣。幾個月過去，宋仁宗以為件事已經平息，再次對張堯佐委以重任，包拯第一個唔同意。就係咁，包拯前後共彈劾咗張堯佐6次，宋仁宗先肯聽從包拯嘅意見，接受張堯佐辭去要職。

除咗張堯佐，朝中唔少重臣都曾因為為官不正被包拯彈劾過。包拯彈劾嘅官員數量之多史上罕見，所以當時京城將被包拯彈劾過嘅官員稱為「有包彈」，無被彈劾過的嘅就係「沒包彈」。 

圖為包拯畫像同《包青天再起風雲》劇照，原圖嚟自網絡。