提起古代絲綢之路，唔少人都會諗起敦煌呢個地方。位於依家甘肅嘅敦煌，係一個世界歷史文化重鎮，莫高窟同周邊佛洞每年吸引無數旅客去呢度參觀。其實大家有無諗過，敦煌點解咁多壁畫佛像？

自古以嚟，敦煌呢個地方都係絲綢之路上一個重鎮，敦煌咁重要嘅原因係呢個地方係一個綠洲，中外商旅嚟到呢度都要歇一歇補給下，整頓一下再上路。特別係向西出行嘅商旅，因為之後嘅路途要穿越塔克拉瑪干沙漠，所以敦煌就成為一個重要嘅補給站。

另一方面，無論係由東向西出行嘅人，抑或由西向東出行嘅人，路途上都有好未知嘅危機。所以，好多人就响敦煌歇腳嘅時候，就會刻個佛像拜拜，祈求出行一切順利。呢個約定俗成嘅做法，經過歷代不斷咁積累落嚟，就令敦煌成為一個佛教藝術嘅寶庫。

其實敦煌除咗莫高窟，仲有西千佛洞、榆林窟同東千佛洞，組成一個敦煌石窟群，大家有興趣不妨去睇睇。