上次講起國共內戰期間，解放軍响1949年4月攻陷山西首府太原，結束山西省政府主席閻錫山嘅38年統治。唔講唔知，其實軍閥閻錫山本身唔係好妥國民黨總裁蔣介石，兩人喺1930年仲試過响中原大戰中兵戎相見。中原大戰嘅成因可以追溯至1928年「東北易幟」，當時奉系領袖張作霖响皇姑屯被日本關東軍刺殺，張作霖個仔張學良返回奉天繼位，並除去北洋政府五色旗，改掛青天白日紅旗，實現東北統一。不過之後地方軍閥仍然保留軍事、人事、行政同財政大權，危及當時蔣介石嘅統治地位同埋政府經濟，最後仲發爆衝突添！

1929年，國民政府成立「國軍編遣委員會」，推動軍隊中央化，削減軍隊數目以減低支出，呢個舉動導致各軍事派系非常緊張，逐漸出現反南京嘅聲音。最先同蔣介石決裂嘅係李宗仁、白崇禧等新桂系軍閥，雙方响1929年3月爆發「蔣桂戰爭」，最終新桂系潰敗，3人出走海外。有「倒戈將軍」之稱嘅馮玉祥响5月亦同蔣介石發生衝突，同樣以失敗告終。

到咗1930年，閻錫山聯同李宗仁、馮玉祥，以及失勢嘅國民黨左派領導人汪精衛，組成反蔣聯盟，雙方爆發戰爭，投入過130萬兵力，兵士傷亡超過30萬，戰事包括直、魯、豫、陝、鄂、湘、桂等省份。最終蔣介石陣營獲勝，馮玉祥下野，閻錫山宣布辭職。不過喺翌年，由於日本侵華，蔣介石迫於無奈同包括閻錫山在內嘅反對勢力修好，閻錫山重新上場，恢復國民黨中央執行委員一職，1932年獲委任為太原綏靖主任。

原圖取自網絡。