一提起香港嘅殭屍片，應該好多人會同阿史一樣，第一時間就諗起林正英，皆因佢扮演嘅道長形象深入民心，已經成為一代經典。

林正英1963年加入京劇團，拜粉菊花同于占元做師傅，同元華、洪金寶、成龍等齊齊受訓，17歲就喺邵氏電影做特技演員。由於林正英身形瘦小，當時咗過唔少女演員嘅替身。後嚟，林正英開始做武術指導，李小龍嘅大部份電影都係由林正英同陳會毅做武術指導。據講李小龍好滿意林正英嘅動作設計，拍武戲果陣如果無林正英在場，李小龍寧願唔開機。

70年代果陣，林正英拍過唔少功夫片，例如《龍爭虎鬥》、《猛龍過江》、《死亡遊戲》、《林世榮》等，口碑不俗，但真正令佢演藝事業走上巔峰嘅，係1985年嘅《殭屍先生》。戲入面，林正英飾演嘅道長正氣凜然，法術高強得嚟又有小小詼諧，再加上錢小豪同許冠英呢兩個有啲烏龍嘅徒弟，三師徒嘅黃金組合令《殭屍先生》成為殭屍片經典。糯米、桃木劍、符咒係對付殭屍法寶，停止呼吸可以避開殭屍等橋段，除咗吸引觀眾之外，亦對後嚟嘅殭屍片有好大影響。由於《殭屍先生》大受歡迎，1995年，亞視以高薪聘請林正英演出電視劇《殭屍道長I》同續集《殭屍道長II》。

拍攝《殭屍道長I》時，林正英同演員宛瓊丹相識、相戀，仲有意結婚。不過天意弄人，後嚟林正英患上肝癌，唔忍心拖累宛瓊丹，就同佢提出分手，甚至靜靜雞搬走咗。1997年，當亞視籌備開拍《殭屍道長III》嘅時候，林正英肝癌病逝，終年44歲。

圖為《殭屍先生》劇照。網上圖片