早排講起《電流戰爭》呢套戲，戲入面除咗有發明家愛迪生同鐵路大亨威斯汀豪斯之外，亦都有愛迪生競爭對手、天才發明家特斯拉嘅蹤影。但唔講唔知，原來美國著名嘅尼加拉瓜瀑布都同特斯拉有關係㗎，喺瀑布附近仲有一座特斯拉嘅雕像添。

話說喺1893年，世界博覽會喺美國芝加哥舉行，特斯拉協助西屋公司起咗一個大型交流電（電流嘅一種）發電設備，為成個展場提供電力，並借呢個機會向大眾宣傳交流電系統。當時嘅美國總統克里夫蘭演講完之後，隨即撳掣，五顏六色嘅燈亮起，令全場人為之驚嘆。之後，尼加拉瓜瀑布電力公司就決定採用西屋公司嘅交流電系統，利用瀑布水位落差產生電力。

尼加拉瓜瀑布嘅發電站於1897年建成，當中運用咗特斯拉9項專利發明，兩年後成為35公里外嘅紐約州水牛城主要電力來源。呢座發電站落成至今超過120年，仍然運作正常，真係犀利。响1976年，特斯拉嘅祖國南斯拉夫送咗個特斯拉雕像俾紐約州，豎立喺尼加拉瓜瀑布附近，紀念佢嘅貢獻。

圖片為尼加拉瓜瀑布、特斯拉雕像，取自網絡。