今日係內地第35個教師節，老師肩負住教育下一代嘅責任，所以特別定咗一個節日紀念佢哋嘅付出，等老師可以得到社會尊重。但點解揀咗今日做教師節？講起嚟真係一匹布咁長，阿史儘量簡單講講。

舊時社會普遍贊成有一個專門為老師而設嘅節日，但對於設喺邊日真係眾說紛紜。新中國成立之後,教育部同全國教育工會曾宣佈「五一勞動節」亦係「教師節」；詩人冰心主張定喺春暖花開嘅日子；作家葉聖陶建議喺每年秋季學生入學嘅時候；有人又建議定喺政治家馬克思嘅誕辰。亦有人提議用孔子誕辰，不過因為孔子出生日成疑，最後都無採用。

1984年，北京師範大學校長王梓坤先呼籲將9月其中一日定為全國教師日。王梓坤將呢個諗法講俾媒體知，媒體翌日就發文章《王梓坤校長建議開展尊師重教月活動》，前國家領導人鄧小平亦講過要尊重教師。同年12月，王梓坤起草《關於在全國開展「尊師重教」月的建議》，又聯合其他人一齊連署寫建議書遞俾全國人大常委會。1985年，喺第六屆全國人大常委會九次會議上，國務院同意建立教師節，並將每年9月10號設為教師節，王梓坤亦成為教師節嘅「倡議設立第一人」。

國家主席習近平嘅父親習仲勳亦曾為設立教師節獻策，早於1981年，習仲勳聽取全國教育工會主席、教育部副部長意見，聯合兩個機構寫報告請示中央，為教師節設立出一分力。

圖為王梓坤，原圖嚟自網絡。