娛樂圈入面，許氏一門四傑，有大哥「冷面笑匠」許冠文、專注幕後工作嘅二哥許冠武，「歌神」細佬許冠傑，惟獨老三許冠英2011年懷疑因心臟病發而匆匆離世，令許氏兄弟從此三缺一。

尋日提過殭屍道長林正英，其實佢嘅「徒弟」許冠英同樣令觀眾印象深刻。許冠英喺1971年加入邵氏兄弟有限公司嘅演員培訓班，之後喺許冠文自導自演嘅《鬼馬雙星》入面演出而嶄露頭角，跟住繼續拍住自家兄弟許冠文同許冠傑出演《天才與白痴》、《賣身契》、《半斤八兩》、《摩登保鑣》等喜劇電影，相當賣座。

除咗兄弟同心，票房多金之外，許冠英「單飛」拍攝嘅電影都有唔錯口碑，例如《發錢寒》、《殭屍先生》、《錢作怪》等。喺戲入面，許冠英擅長扮演被欺負嘅小人物，而現實中嘅佢都自嘲自己只係個小人物，但從來都唔妒忌兄弟嘅成就，一直做好自己本份。當年許冠英憑住飾演《殭屍先生》嘅徒弟文才，獲提名金像獎最佳男配角，不過佢認為自己嘅角色係男主角，因而拒絕提名，成為首位向金像獎提名say no嘅演員。

除咗電影，許冠英喺音樂上都有一定成就，同電影《發錢寒》同名嘅專輯係佢發行嘅第一張粵語專輯，更加係當年最暢銷嘅唱片。2006年，許冠英仲喺理工大學開過「許冠英斤兩十足演唱會」添。四兄弟入面，許冠英同許冠傑最老友，兩個人成日一齊jam歌，許冠英亦曾經為細佬作過唔少名曲，就好似〈無情夜冷風〉、〈夜雨聲〉等。

圖為許氏家庭照。網絡圖片