前排有親戚去旅行，買咗啲茶葉返嚟做手信送俾阿史，認真有心。講起茶葉，過往係中國19世紀其中一種主要出口貨品，清末商人徐潤就有「近代中國茶王」之稱添，後來佢賺到錢仲撈埋地產，成為「地產大王」。賺到錢之後，徐潤亦開始從事公益事業、同政府合作推動國家發展，當年清政府派學生去美國留學，徐潤就為班學生出資擔保，受惠嘅學生包括「中國鐵路之父」詹天佑、民國政府首任總理唐紹儀等等。

徐潤1838年生於廣東一個買辦世家，伯父徐昭珩係上海寶順洋行嘅買辦。徐潤喺15歲嘅時候去到上海寶順洋行工作，佢份人勤奮、刻苦，深得器重。後來經歷第二次鴉片戰爭之後，清政府簽署一系列不平等條約，喺各地增設通商口岸，徐潤所屬嘅寶順洋行喺多個地點增設分行，而徐潤就成為統領各分行嘅總買辦。

喺徐潤帶領下，寶順洋行嘅生意風生水起，徐潤亦憑賺取佣金致富。到咗1868年，徐潤脫離寶順洋行、自立門戶，佢利用自己多年來建立返嚟嘅貿易關係同貨源，開咗間寶源祥茶棧，從事出口茶葉生意。當時寶源祥茶棧係上海出口茶葉份額最大嘅茶棧，於是佢就被稱為「近代中國茶王」喇。

當時茶葉係中國四大出口商品之一，徐潤透過出口茶葉累積巨額財富，之後就開始涉足地產。徐潤眼光非常好，一早就洞悉到上海嘅發展趨勢，佢喺一啲有發展潛力嘅土地，然後去到半開發階段就將啲地賣出，再用錢買更多土地，逐漸累積龐大嘅房地產網絡，成為華商之中嘅「地產大王」。

原圖取自網絡。