葛量洪醫院、以前嘅葛量洪教育學院，相信香港嘅唔少史友都聽過葛量洪 呢個名，不過佢嘅事就未必個個都知。葛量洪喺1947年至1957年擔任香港總督，任期長達十年，僅次於麥理浩。佢上任初期，中國爆發國共內戰，大批難民來港定居，令香港人口急速增加，葛量洪成功將香港由轉口港轉型為製造業基地，解決難民就業問題。另一方面，葛量洪喺房屋、教育同醫療等方面亦都有唔少建樹。

喺二戰期間，香港大部分房屋遭到破壞，雖然戰後港英政府已經著手重建，但由於有大批難民來港，導致房屋嚴重不足，當時港英政府認為難民只會短期留港，於是對難民喺山邊興建寮屋居住「隻眼開隻眼閉」。但到咗1953年聖誕節石峽尾寮屋區發生大火，導致5萬人無家可歸，葛量洪拍板興建徙置大廈，安置居民。雖然徙置大廈嘅環境同而家嘅標準差得多，要共用廁所同浴室，但已經比寮屋嘅環境好得多，大大推動香港嘅公屋政策發展。

教育方面，二戰期間亦有唔少校舍被破壞，葛量洪興建大量中學同小學，喺校舍起好之前，佢決定將學校分為上午、下午、晚三班，令更多適齡學童接受教育，同時為咗應付對教師人數日益增加嘅需求，佢喺1951年開設葛量洪教育學院。醫療方面，佢任內興建或擴建律敦治療養院、葛量洪醫院同廣華醫院等等，另外又動工興建青山精神病院，照顧精神病人。

圖為葛量洪參觀徙置區，取自網絡。