一年一度嘅諾貝爾獎又陸續公佈，記得幾年前有位優秀科學家屠呦呦，憑住中醫藥成就奪得醫學獎，相關療法更令唔少人受益。屠呦呦主力研究擊退瘧疾藥物，呢個病係世界上其中一種高死亡率嘅傳染率，而目前世界衛生組織推薦嘅最佳療法，係由青蒿素搭配其他抗瘧疾藥物組成嘅聯合療法，當中嘅青蒿素正正就係屠呦呦團隊所發現。屠呦呦因此獲的2015年諾貝爾獎，呢個係中國醫學界迄今為止獲得嘅最高獎項，亦係中醫藥成果獲得嘅最高獎項。不過榮耀背後，又有幾多人知道當年屠呦呦嘅研究環境，係有幾咁艱辛。

屠呦呦生於浙江寧波，上世紀60年代，喺舊有抗瘧療法失效嘅情況下，當時仲係中醫研究院中藥研究所任研究實習員嘅屠呦呦，接受咗國家瘧疾防治專案「523」辦公室派落嚟嘅抗瘧研究任務。先唔提當時國內科研水平，單單係研究環境落後、資金人手不足等，都係屠呦呦需要面對嘅難關。透過整理中醫藥典籍、走訪著名老中醫之後，屠呦呦足足彙集咗640幾種治療瘧疾嘅中藥秘方。不過，就算知道中草藥蒿類可以有效抗瘧，但喺蒿類提取物實驗藥效唔穩定嘅情況下，屠呦呦依然無辦法研製出對抗瘧疾嘅治療方法。

就喺呢個樽頸位，東晉葛洪所著嘅《肘後備急方》俾咗屠呦呦新靈感，《肘後備急方》入面有青蒿截瘧嘅記載：「青蒿一握，以水二升漬，絞取汁，盡服之。」1972年，屠呦呦通過改用低沸點溶劑嘅提取方法，發現咗青蒿素。不過，發現青蒿素只係成功嘅第一步，臨床試驗先係關鍵，當時藥廠停工，無人生產藥物，又無資源人手。屠呦呦團隊唯有自己製藥，搞到流鼻血、皮膚過敏、頭暈腦脹，屠呦呦甚至得咗中毒性肝炎。為咗測試提取出嚟嘅藥物安全、有效，屠呦呦團隊仲親身上陣做白老鼠試藥。終於，皇天不負有心人，屠呦呦等科學家嘅努力無白費，青蒿素衍生物成為目前最有效、無併發症嘅瘧疾聯合用藥。

圖為屠呦呦獲頒諾貝爾獎情景，原圖嚟自網絡。