專制跋扈嘅慈禧太后都有佢會驚嘅人？仲要係佢個養女？無錯，呢個養女唔擦慈禧鞋之餘，經常當面直諫。而慈禧居然唔怪罪，反而對佢疼愛有加，仲有啲驚咗佢？呢個養女就係載入《清史稿》嘅最後一位公主——榮壽固倫公主。

榮壽固倫公主係恭親王奕訢嘅大女，7歲被慈禧收為養女，人稱大公主。大公主自細就顯得老實、沉穩，深得慈禧歡心，12歲嘅大公主就有慈禧親自為佢選婿。可惜呢個夫婿婚後5年就病死，留低大公主守寡，兩公婆亦無兒無女。慈禧見大公主一個人孤零零，又接咗佢入宮。但大公主唔似慈禧身邊嘅其他人咁奉承佢，反而會直言話慈禧衣著冶豔、鋪張浪費，搞到慈禧每次整新衫都偷偷瞞住大公主，見大公主嘅時候亦特登換返件樸素啲嘅衫。

慈禧唔單止私生活上有啲怕咗大公主，連重要政事亦忌佢三分。光緒帝當年變法失敗，慈禧嘅意思係要將佢廢黜，光緒嘅寵妃珍妃求情不果，情況亦唔好得去邊。當時大公主同光緒、珍妃交好，慈禧要處置光緒帝妃嗰陣，佢正喺去省親嘅路上，聽到呢個消息，即刻趕回宮，為兩人求情。不過珍妃最終難逃一劫，後嚟八國聯軍攻入北京，慈禧同光緒逃走，有講法話佢趁住大公主唔喺度，命人將珍妃推入井中。

圖為大公主同慈禧，原圖嚟自網絡。