四大名著《紅樓夢》嘅作者曹雪芹本名曹霑，號雪芹、芹圃、芹溪。點解佢嘅號裡面都有個「芹」字？其實曹雪芹嘅心願係做一棵芹菜，為百姓醫病解難，而佢個號嘅由來除咗呢個原因，仲同佢家道中落之後嘅故事有關。

話說曹雪芹屋企自從被抄家之後，日子越嚟越唔好過，居住嘅環境又細又嘈，唔適合寫書，於是曹雪芹就搬咗去西山腳下住。西山附近有間茶館，曹雪芹成日去幫襯，夥記馬青欽佩佢嘅為人同才華，每次曹雪芹嚟，馬青都會送上一碟小菜。久而久之，曹雪芹同馬青就成為知己。

有一次，曹雪芹幾日都唔見馬青，一問之下先知原嚟馬青病咗。曹雪芹專程上門探病，為馬青診脈，仲開咗劑偏方俾佢。呢個偏方就係野芹菜湯，馬青連服幾日之後就好返，而曹雪芹嘅醫術亦廣傳開去。

圖為曹雪芹畫像，原圖嚟自網絡。