人造衛星為大眾通訊帶嚟唔少方便，科技先進嘅背後，當然唔少得科學家嘅努力。有「中國衛星之父」之稱嘅孫家棟，曾經參與四十幾粒人造衛星嘅發射，多年嚟嘅貢獻有目共睹。估佢唔到嘅係，孫家棟當初之所以走上航天之路，其實係純屬偶然，而呢個偶然竟然同佢想食紅燒肉有關？

話說孫家棟一開始嘅時候想讀土木工程，做一位橋樑工程師，不過後嚟喺19歲考咗入哈爾濱工業大學，變咗修讀汽車專業。到咗1950年，因為一次偶然嘅機會，就改變咗佢一生。話說當年元宵節嗰陣有好多同學都趕住返屋企團聚，孫家棟都唔例外，諗住去家姐屋企住。但佢收到風話嗰晚學校晚餐有紅燒肉，於是佢決定食埋晚飯先走，就喺呢個時候學校領導嚟到飯堂，宣布解放軍空軍招人，孫家棟報名，當晚隨即就上火車，前往北京。

之後，空軍就挑選咗包括孫家棟在內嘅30名優秀學員，送去蘇聯茹柯夫斯基空軍工程學院學習，1958年學成回國之後，就從事導彈研究。1967年，孫家棟獲「中國導彈之父」錢學森點名，以38歲之齡擔任中國第一粒人造衛星「東方紅一號」嘅技術總負責人，「東方紅一號」最終响1970年4月24日順利升空。自此孫家棟轉為從事人造衛星工作，一做就做咗幾十年，2004年佢以75歲高齡肩負起中國探月工程嘅重任，擔任總設計師，繼續為中國航天範疇作出貢獻。

圖片為孫家棟、東方紅一號，取自網絡。