提起小兒麻痹症，後生一代或者未必識，但呢個病曾經喺內地肆虐，引起全國恐慌。小兒麻痹症係由脊髓灰質炎病毒引致，具高度傳染性，主要出現喺幼童身上。直至「糖丸之父」顧方舟研發咗小兒麻痹症疫苗，並將疫苗改良成可以喺室溫下保存嘅「糖丸」，令全國各地嘅小朋友都可以受惠，從而令內地實現全面消滅小兒麻痹症。

1955年，小兒麻痹症喺江蘇南通一帶大規模爆發，之後迅速蔓延到青島、上海、濟寧、南寧等地。兩年後，顧方舟臨危受命，帶住研究小組去解放軍軍事醫學科學院度正式研究對抗同治療小兒麻痹症嘅方法。當時個研究基地面臨資料少、交通運輸困難、物資短缺、蘇聯撤走所有援華專家等困難，顧方舟團隊都一一克服，成功研製出口服疫苗。

喺測試疫苗嘅安全階段，顧方舟冒住可能會癱瘓嘅風險，以身試藥。不過，大部分成年人對脊髓灰質炎病毒有免疫力，只有小朋友先可以試出疫苗是否安全有效。於是，顧方舟俾自己啱啱滿月嘅仔服用疫苗，證實疫苗安全有效。1960年，首批500萬份疫苗喺全國十一個城市推廣，幫助成千上萬嘅小朋友預防小兒麻痹症。

但係，顧方舟好快留意到一個問題，疫苗喺運輸過程中需要冷藏，運輸時好唔方便。經過一年幾嘅研究，顧方舟團隊研製出著名嘅「糖丸」，既可以喺常溫下保存多日，又可以方便運送到偏遠地區，而糖衣包裝嘅藥丸更令小朋友易於入口。就係咁，糖丸疫苗令無數小朋友免於傷殘，亦令小兒麻痹症嘅發病率大大下降。2000年，世界衛生組織證實，中國阻斷咗小兒麻痹症嘅傳播，成為無脊灰國家。

原圖嚟自網絡。