宜家啲考試都係老師出題考核學生，但民國有位叫蒙文通嘅教授竟然反其道而行，叫學生出題考自己？學生嘅問題問得好嘅話，蒙文通仲要請學生飲茶？究竟搞咩科？

 蒙文通係四川人，佢師從今文經學大師廖平、古文經學大師劉師培，成名後又向近代佛學大師歐陽竟無學嘢，可以話係貫通經、史、諸子學說，又融合咗佛道、宋明理學嘅國學大師。蒙文通好鍾意飲茶，佢當年喺四川大學任教嘅時候，特登將考場搬去學校附近嘅茶鋪度。考試當日，蒙文通就坐喺茶鋪，學生依次嚟搵佢「飲茶」。學生嘅考題就係就住今學期所學嘅內容，出一條題考蒙文通，題目出得好，蒙文通就請學生飲茶。換言之，如果學生飲唔到蒙文通杯茶，即係話今學期嘅考試成績都係凍過水嘅多。

 咁新穎嘅考試模式真係第一次聽，不過諗深一層，要就住成個學期所學，問一條有意思嘅問題都好有難度，亦要求學生對學到嘅知識有所了解，自己再消化、融匯貫通一輪先得，絕對唔容易。

原圖嚟自網絡。